Edhe një javë me mot mjaft dinamik para nesh. Fillimi i javës krejtësisht stabil dhe me diell. Edhe temperaturat janë dhe do të jenë relativisht të larta për këtë periudhë kohore.
Ndryshimi i motit do të fillojë në ditën e dytë të javës kur kemi krijimin e një ciklogjeneze në Mesdhe. Vende-vende do të fillojnë reshjet e shiu të cilat deri të mërkurën do të shtrihen në gati tërë territoret tona. Temperaturat shënojnë ulje. Edhe pjesa e parë e ditës së martë mund të jetë e ngrohtë për këtë periudhë kohore, ndërkohë që reshjet fillojnë në veri dhe perëndim duke u shtrire gradualisht drejt jugut dhe lindjes. Më së paku reshje shiu priten në juglindje të Kosovës, perëndim dhe juglindje të Shqipërisë.
Pra, në mesjavë do të kemi krijimin e një cikloni mesdhetar, pikërisht në territorin e Italisë me qendër.
Ky ciklon do të na sjellë vranësira të shpeshta dhe reshje shiu të cilat më intensive do të jenë në veri të Shqipërisë dhe perëndim e veri të Republikës së Kosovës. Të mërkurën me uljen e temperaturave reshje bore priten në zonat malore dhe në disa zona kodrinore-malore. Mund të ndodhë ndonjë fjollë bore edhe në zonat e ulëta mbidetare.
Të enjten pritet të kemi përmirësim të motit, megjithatë nga e premtja dhe fundjava moti pritet të dinamizohet edhe më shumë.
Opsion më së i mundshëm këtë fundjavë.
Filimisht të premten pritet të kemi shtim të sërishëm të vranësirave dhe reshje lokale shiu, ndërsa të shtunën mund të kemi përkeqësim dramatik të motit me krijimin e një ciklogjeneze me shtrirje të gjerë që nga Deti Jon deri në Detin e Zi në lindje dhe ardhjen e një super fronti të ftohtë nga veriu.
Si pasojë reshjet e shiut do të shndërroheshin në reshje bore në Kosovë dhe shumë vise në Maqedoninë Veriore, Luginë të Preshevës, veri të Mali të Zi dhe viset kodrinore-malore të Shqipërisë. Temperaturat do të shënonin ulje të ndjeshme të shoqëruara me reshje bore, shtresa simbolike bore dhe erëra mjaft të ftohta veriore.
Sqarim shtesë:
Pasi që kemi të bëjmë me një parashikim të gjatë, ndryshime për fundjavën që po vjen mund të ketë, por tani të gjitha rrugët qojnë drejt faktit se do të kemi një “goditje më serioze dimërore” dhe borë edhe në shumë ultësira, megjithatë kjo ende nuk është definitive, prandaj kur të sigurohemi më shumë do të dalim me postime të veçanta për reshje eventuale bore ose edhe largimin eventual të tyre./MeteoBallkan
