Pas përfundimit të nxehtësisë verore e cila zgjati me javë të tëra në Kosovë më në fund kemi mundur të marrim frymë pak më lirshëm. Temperaturat u ulën edhe në Shqipëri, por në perëndim të vendit vazhdon vapa gati pa ndërprerje.
Kjo javë në Kosovë filloi me diell e vranësira lokale dhe me temperatura të këndshme. Ngjashëm edhe në Shqipëri dhe Maqedoninë Veriore u disa rajone ishin mjaft të nxehta.
Ndryshim të motit presim të martën në gati të gjitha viset do të kemi një sistem frontal nga veriu që do të rrugëtojë shumë shpejt në drejtim të jugut. Fillimisht në Kosovë do të ketë shtim të konsiderueshëm të vranësirave me reshje lokale shiu duke mos përjashtuar edhe rrebeshe lokale.
Pastaj, masat destabilizuese ajrore do të kalojnë edhe në Shqipëri dhe Maqedoninë Veriore ku zhvillimet konvektive do të jenë më të fuqishme për shkak të nxehtësisë më të madhe në sipërfaqe apo thjesht për shkak të temperaturave më të larta. Megjithatë të gjitha zhvillimet do të jenë të izoluara dhe jo në të gjitha viset. Më së shumti rrebeshe kësaj radhe priten në perëndim të Shqipërisë, Mal të Zi dhe disa pjesë të Kosovës. Shumë rajone do të mbesin pa reshje.
Temperaturat do të pësojnë ulje së pari në veri të Kosovës pastaj në drejtim të viseve tjera.
Megjithatë, të mërkurën menjëherë do të kemi stabilizim të motit dhe rritje të ndjeshme të temperaturave. Vranësirat ditore paqësore nuk do të mungojnë.
Të enjten dhe të Premten na pret mot kryesisht stabil, me diell dhe me vranësira të pakta ditore. Nuk priten reshje atmosferike dhe temperaturat do të vazhdojnë të rriten.
Fundjava vjen po ashtu e nxehtë, por mund të ndodhë që të kemi një fundjavë mjaft jo-stabile. Pra, përpos temperaturave jo të ulëta do të ketë gjasa për vranësira e zhvillime të stuhive lokale të shiut me vetëtima dhe bubullimë. Nuk do mungojnë periudhat me diell. Të dielën mundësi për ulje më të ndjeshme të temperaturave në veri të viseve tona. Po ashtu temperaturat gjatë fundjavës do të pësojnë ulje të ndjeshme në zona ku priten vranësira e reshje më të dendura.
Pra, për fund edhe një javë me karakteristika tipike verore. Më freskët do të jetë vetëm dita e martë me reshje lokale e erëra veriore. Pastaj, pasojnë ditë stabile dhe të nxehta, kurse fundjava vjen me stuhi lokale shiu me vetëtima dhe bubullimë dhe ulje të lehta të temperaturave, më të theksuara në rajonet me reshje e zhvillime.
Parashikimi për këtë javë mund të pësojë ndryshime sidomos ma afrimin e fundjavës dhe për çdo ndryshim eventaul do të njoftoheni me kohë në postimet tona të përditshme./MeteoBallkan
