Nesër në Kosovë pritet të mbajë mot me vranësira dhe intervale kohore me diell. Reshje atmosferike nuk pritet të ketë. Temperaturat pritet të luhatën nga -5 gradë Celsius deri në 5 gradë Celsius gjatë ditës kur edhe pritet stabilizim i motit.
Në Shqipëri dhe tërë rajonin nesër pritet të mbajë mot kryesisht stabil. Mëngjesi pritet të jetë i ftohtë, ndërsa dita me alternime mes vranësirave dhe intervaleve kohore me diell.
Të enjtën rikthehen reshjet e shiu. Në viset e larta malore reshje bore. Vende-vende priten reshje të dendura shiu sidomos në Shqipëri, por edhe në shumë pjesë të Malit të Zi dhe Kosovës.
Të premtën pritet mot kryesisht i vranët dhe herë pas here me reshje lokale shiu pak më të theksuar në Shqipëri. Në viset malore reshje bore.
Për fundjavë pritet të kemi intensifikim të reshjeve. Në Shqipërinë mesdhetare priten reshje të dendura shiu dhe rrebeshe lokale shiu me vetëtima dhe bubullimë. Në Kosovë priten reshje shiu të cilat me uljen e temperaturave herë pas here pritet të shndërrohen në reshje bore dhe prapë në reshje shiu. Në Mal të Zi priten reshje të dendura bore, përpos bregdetit ku priten reshje shiu. Reshje të dendura shiu priten edhe në Maqedoninë e Veriut, ndërsa në viset malore reshje të dendura bore. Gjatë fundjavës me uljen e temperaturave reshje bore priten edhe në Luginën e Preshevës dhe disa ultësira në Maqedoninë Veriore./MeteoBallkan
