Nesër në Kosovë do të mbajë mot mjaft i ngrohtë për këtë periudhë kohore, mirëpo pritet përkeqësim gradual dhe i fuqishëm i motit. Do të ketë erëra herë pas here dhe vende-vende të fuqishme nga jugu. Paradite mund të ketë edhe intervale kohore me diell, ndërsa pasdite shtim i madh i vranësirave. Në Dukagjin do të fillojnë reshjet e shiut, herë pas here intensive me mundësi edhe për rrebeshe shiu me vetëtima dhe bubullimë. Pasdite dhe deri në mbrëmje vonë reshjet e shiut do të përfshijnë krejt Kosovën. Vende-vende priten reshje mjaft intensive shiu të cilat mund të qojnë në përmbytje.
Edhe në Shqipëri nesër ngrohtë, por me përkeqësim të serishëm të motit. Reshjet e shiut dhe rrebeshet do të fillojnë në veri e deri në mbrëmje vonë edhe në jug. Vende-vende priten rrebeshe mjaft intensive shiu nganjëherë edhe me vetëtima dhe bubullimë. Mund të ketë edhe përmbytje lokale.
Reshje të fuqishme shiu nesër priten në Mal të Zi të cilat pashmangshëm do të qojnë në përmbytje, ndërsa në Maqedoninë Veriore gjatë ditës kryesisht thatë dhe ngrohtë, me erëra jugore. Reshjet e shiut pritet të fillojnë gjatë mbrëmjes vonë ose natën.
Të enjten do të vazhdojnë reshjet e herëpashershme lokale intensive të shiut. Gjatë ditës pritet depërtimi i frontit të fuqishëm të ftohtë nga veriu. Erërat do të fillojnë të fryjnë të akullta nga veriu të cilat do të kushtëzojnë reshje bore. Vende-vende priten reshje intensive bore në Kosovë por afatshkurtra. Disa rajone mund të mbesin me fare pak reshje bore. Pas kalimit të frontit reshjet do të ndërpriten shumë shpejt për shkak të depërtimit të anticiklonit të fuqishëm skandinav i cili do të vijë së bashku me ajrin e thatë dhe acartë siberik.
Për fundjavë një ciklon nga përtej Italisë do ti afrohet rajonit tonë i cili në kombinim me ajrin e ftohtë siberik do të na sjellë edhe reshje bore. Në shumë vise në Shqipëri dhe Maqedoninë Veriore priten reshje të dendura bore. Edhe në Kosovë priten reshje të herëpashershme bore. Sa më afër jugut të vendit më shumë reshje bore, ndërsa në veri më pak. Në shumë rajone në Shqipëri ku bora është fenomen shumë i rrallë mund të ketë reshje spektakolare bore./Meteoballkan
