Nesër në Kosovë pritet të mbajë mot kryesisht i vranët dhe i ftohtë, me erëra të ftohta veriore dhe herë pas here me reshje lokale bore. Në disa ultësira pritet reshje të përziera shi dhe borë, por në përgjithësi nuk priten reshje të mëdha. Temperaturat shënojnë ulje dha ajo maksimalja pritet të arrijë deri në 3 gradë Celsius.
Në Shqipëri nesër pritet të mbajë mot kryesisht i vranët dhe me riga lokale shiu e fjolla lokale bore. Reshjet do të jenë të intensitetit më të dobët krahasuar me ditët e kaluara. Pasdite pritet kthjellim i pjesërishëm i motit në perëndim dhe veri të vendit, por mbetet ftohtë.
Reshje lokale shiu e bore priten nesër edhe në Maqedoninë Veriore, Mal të Zi dhe Luginën e Preshevës.
Nga e hëna na pret mot kryesisht i vranët në viset kontinentale. Priten edhe reshje afatshkurtra të herëpashershme lokale bore. Mund të ketë edhe intervale të shkurtra kohore me diell. Në Shqipëri priten edhe kthjellime dhe nuk priten reshje atmosferike, por mbetet ftohtë edhe atje me temperatura minimale në “minus” duke përfshirë edhe mesdheun shqiptar.
Për shkak të fuqizimit të masave ajrore anticiklonike Shqipëria më në fund nga e hëna pritet të “pushojë” nga reshjet atmosferike./MeteoBallkan
