Nesër në Kosovë na pret mot i vranët e me reshje lokale shiu e bore. Pasdite dhe në mbrëmje priten reshje bore në shumicën e territorit të Republikës së Kosovës duke përfshirë edhe zonat e ulëta, megjithatë nuk do të ketë reshje në të gjitha ultësirat e Dukagjinit. Më shumë reshje bore priten në veri, verilindje e të gjitha zonat kodrinore-malore të vendit. Më pak reshje bore në jug dhe juglindje. Në përgjithësi nuk priten reshje të mëdha që do të formonin shtresa, por vende-vende priten shtresa simbolike dekorative. Normalisht në zonat kodrinore-malore priten shtresa por jo të mëdha.
Në Shqipëri e Maqedoninë Veriore nesër pritet të mbajë mot i vranët e me riga lokale shiu. Në viset kodrinore-malore të Maqedonisë së Veriut priten reshje lokale bore. Po ashtu edhe në verilindje të Shqipërisë priten reshje lokale bore. Reshje bore po ashtu priten edhe në Luginën e Preshevës. Në zonat tjera kryesisht me riga të dobëta lokale shiu.
Të martën na pret mot i ftohtë, me vranësira, ndërsa pasdite priten edhe intervale kohore me diell. Në mbrëmje shumë ftohtë për shkak të kthjellimit të motit.
Të mërkurën cikloni i ri nga Mesdheu sjellë reshje të reja shiu./MeteoBallkan
