Nesër në Kosovë pritet të kemi mot kryesisht të vranët dhe me reshje shiu. Reshje më intensive dhe më të shpeshta priten në Dukagjin e më të pakta në lindje dhe juglindje të vendit. Herë pas here mund të ketë edhe rrebeshe lokale shiu me vetëtima dhe bubullimë, ndërsa erërat e “ngrohta” jugore dhe juglindore do të fuqizohen. Temperatura maksimale pritet të arrijë deri në 13 gradë Celsius.
Në Shqipëri nesër pritet të mbajë mot i vranët dhe me reshje të shpeshta shiu. Herë pas here, vende-vende priten reshje të dendura shiu dhe rrebeshe lokalisht të fuqishme shiu me vetëtima dhe bubullimë.
Reshjet do të shtrihen nesër edhe në Maqedoninë Veriore dhe Kosovën lindore. Fillimisht në perëndim të Maqedonisë e pastaj deri në mbrëmje edhe në viset tjera.
Edhe ditëve të ardhshme na pret mot kryesisht i vranët, por me gjasa për intervale të shkurtra kohore me diell në disa rajone. Reshjet e shiut do të jenë mjaft të shpeshta, vende-vende intensive dhe të shoqëruara edhe me rrebeshe lokalisht të fuqishme me vetëtima dhe bubullimë.
Të premtën ulje graduale e temperaturave dhe në shumë vise pritet të fillojnë reshjet e borës, fillimisht në viset kodrinore-malore, pastaj edhe në disa ultësira të Kosoves. Për fundjavë na pret bora e parë “serioze” për këtë dimër, ndërsa në viset malore të Kosovës veçanërisht në malet e Rugovës ka gjasa për reshje shumë intensive bore gjatë kësaj jave. Për shkak të temperaturave të larta nganjëherë (deri të enjtën mbrëma) edhe nëpër malet e larta mund të ketë reshje intensive shiu./MeteoBallkan
