Sonte në shumë pjesë të Shqipërisë dhe Maqedonisë priten reshje të dendura bore. Në Shqipëri në viset bregdetare dhe ultësira kryesisht me reshje shiu kurse në viset kontinetale me reshje bore. Në Maqedoni do të krijohen shtresa edhe nëpër ultësira.
Edhe në Kosovë do të ketë reshje bore të cilat më intensive do të jenë në jug dhe juglindje të Kosovës. Reshjet e borës do të jenë të intensitetit të ndryshëm dhe të herëpashershme si dhe do të vazhdojnë edhe gjatë ditës së nesërme.
Nesër në shumicën e territorit të rajonit tonë do të kemi ditë të vërtetë dimërore me reshje të herëpashershme bore dhe me erëra të ftohta veriore. Temperaturat do të shënojnë ulje dhe nuk do kalojnë mbi 0 gradë celsius me përjashtim të viseve mesdhetare të Shqipërisë. Reshjet e borës do të zgjasin gjatë tërë ditës por nuk duhet pritur reshje intensive me disa përjashtime normalisht. Reshjet do të jenë më të mëdha lokalisht. Në përgjithësi në Kosovë priten nga 3 deri në 10 cm ndërsa lokalisht edhe më shumë, kurse në Maqedoni dhe Shqipëri në viset ku reshjet do të jenë të dendura priten deri në 20 cm e lokalisht edhe më shumë.
Nga e Mërkura do të kemi ndërprerje të të reshurave atmosferike në tërë rajonin tonë por do të jetë mjaft ftohtë dhe temperaturat do të jenë në minus. Nëse kthjellohet moti atëherë minusi do të jetë më i thellë, por sipas të gjitha gjasave do të kemi mot të vranët.
Mot i thatë dhe i vranët pritet edhe ditën e Enjte. Do të jetë mjaft ftohtë, kurse nga e Premta do të ketë gjasa për ngritje të temperaturave.
Detaje tjera rreth këtyre informacioneve në postimet tona të ardhshme. /Meteoballkan
