Nesër në Kosovë na pret mot kryesisht i vranët dhe paradite me reshje lokale shiu. Në viset malore priten reshje bore. Pasdite pritet të ketë kthjellime të pjesshme, ndërsa temperatura maksimale pritet të arrijë deri në 9 gradë Celsius.
Në Shqipëri, Maqedoninë Veriore, Luginë dhe Mal të Zi nesër pritet të mbajë mot me alternime mes vranësirave dhe intervale kohore me diell. Në disa zona ende do të ketë riga lokale shiu e nëpër male reshje afatshkurtra bore.
Të premten na pret mot me alternime mes vranësirave dhe intervaleve kohore me diell. Rrallëkund do të ketë gjasa për ndonjë rigë shiu ose fjollë bore.
Të shtunën mëngjesi mjaft i ftohtë dhe me ngrica. Gjatë ditës do ketë shtim të vranësirave dhe pasdite vonë ose në mbrëmje reshje të pakta, të përziera lokale shiu e bore.
Të dielën na pret mot plotësisht i vranët dhe me reshje shiu e bore. Reshje shiu priten në ultësirat e Shqipërisë, Maqedonisë së Veriut, jugut të Malit të Zi dhe Dukagjinit, ndërsa reshje bore priten në Kosovë, veri të Malit të Zi, verilindje të Shqipërisë dhe viset kodrinore-malore të Maqedonisë së Veriut. Edhe në Luginë priten reshje shiu e në viset kodrinore-malore reshje bore. Sipas ecurive aktuale sinoptike nuk priten reshje të mëdha./MeteoBallkan
