Sonte reshjet e dendura dhe mesatare të borës do të vazhdojnë në shumicën e territorit të Republikës së Kosovës deri në orët e vona të natës dhe orët e hershme të mëngjesit kur pritet që reshjet gradualisht të ulen në intensitet. Do të kemi edhe ulje të temperaturave si pasojë e depërtimit të masave ajrore të ftohta nga veriu. Gjithashtu do të kemi edhe fuqizimin e mëtutjeshëm të erërave veriore dhe veriperëndimore.
Nesër në Kosovë, Shqipëri dhe Maqedoni do të kemi mot kryesisht të vranët dhe mjaft të ftohtë me erëra të ftohta veriore. Në Kosovë vende-vende do të kete edhe reshje bore të intesitetit kryesisht të dobët. Në pjesët tjera të rajonit tonë pritet të mbajë mot i thatë, i ftohtë dhe me erëra të ftohta.
Të Dielën në tërë rajonin tonë pritet stabilizim i motit dhe gjithashtu do të kemi depërtimin gradual të masave ajrore më të nxehta nga Atlantiku dhe Mesdheu. Mëngjesi do të jetë mjaft i ftohtë dhe me acar.
Nga e hëna pritet të kemi përsëri shtim të vranësira si pasojë e afrimit të ciklonit të ri i cili do të gjenerojë reshje atmosferike. Në Shqipëri priten reshje të dendura shiu, vetëm në viset më të larta malore priten reshje bore. Në Kosovë dhe Maqedoni priten reshje kryesisht shiu nëpër ultësira dhe bore në viset kodrinore-malore./Meteoballkan
