Nesër në Kosovë pritet të mbajë mot kryesisht i vranët dhe herë pas here me reshje shiu. Më shumë reshje priten në rajonin e Dukagjinit, por priten edhe intervale të gjata kohore me diell dhe pa reshje fare. Do të vazhdojë të jetë ngrohtë për këtë periudhë kohore për shkak të rrymimeve të forta ajrore nga jugu.
Në Shqipëri nesër pritet të mbajë mot i vranët dhe me reshje shiu. Vende-vende dhe herë pas here priten reshje të dendura shiu dhe rrebeshe intensive shiu me vetëtima dhe bubullimë.
Intervale kohore me diell nesër priten edhe në Maqedoninë Veriore dhe nganjëherë mund të ketë vranësira dhe ndonjë rigë lokale shiu, ndërsa në Mal të Zi priten reshje intensive shiu dhe rrebeshe lokalisht të fuqishme me vetëtima dhe bubullimë.
Në Luginën e Preshevës nesër pritet mot i ngrohtë dhe me erëra jugore. Priten intervale kohore me diell dhe vranësira lokale.
Të dielën na pret mot kryesisht i vranët dhe me reshje shiu në gati krejt rajonin. Vende-vende priten reshje të dendura shiu dhe erëra të forta nga jugu dhe jugperëndimi. Në Shqipëri do të vazhdojnë rrebeshet e fuqishme të herëpashershme të shiut me vetëtima dhe bubullimë.
Të hënën ulje e temperaturave. Fillimisht në viset kodrinore-malore reshjet e shiut do të shndërrohen në reshje bore. Me uljen e mëtutjeshme të temperaturave reshje bore priten edhe në shumë ultësira të Republikës së Kosovës.
Të martën shumë ftohtë dhe na pret ditë e vërtetë dimërore me reshje bore të cilat pritet të ndërpriten. Në Shqipëri më në fund pritet që gradualisht të pushojnë reshjet të paktën përkohësisht./MeteoBallkan