Vapa e madhe në Kosovë i ka orët e numëruara, por ende ka ndjesi të madhe të nxehtësisë mjaft të fortë verore. Fronti i ftohtë do të depërtojë pasdite vonë dhe në pas tij do të pasojë ulja e ndjeshme e temperaturave. Fronti do të përcillet edhe me stuhi të forta lokale me vetëtima e bubullima masive dhe breshër.
Fronti ka arritur deri në Serbi dhe në shumë vende në veri dhe perëndim të Serbisë e sidomos në disa zona në Kroaci e Slloveni temperaturat janë vjeshtore. Në anën tjetër në Greqi sot temperaturat janë deri në 45 gradë Celsius.
Gjatë natës fronti depërton edhe në Shqipëri dhe Maqedoninë Veriore për të siguruar një ditë pa vapë verore siç pritet të jetë e enjta. Reshjet në Shqipëri dhe Maqedoninë Veriore do të jenë më të izoluara, por lokalisht priten stuhi intensive.
Stuhitë më të forta priten në Kosovë orëve të pasdites, ndërsa gjatë natës mund të ketë ende sidomos në rajonin e Dukagjinit.
Të enjten menjëherë përmirësim dhe stabilizim i motit, por mbetet freskët./METEOBALLKAN
