Përkundër diminimit absolut të masave ajrore stabile anticiklonike, nesër në Kosovë dhe disa pjesë tjera të rajonit tonë do të depërtojë një front i ftohtë ajror i cili do të jetë i dobët.
Pas një mëngjesi me mjegull, gjatë paradites mund të ketë intervale kohore me diell, ndërsa pasdite dhe në mbrëmje do të ketë shtim të konsiderueshëm të vranësirave dhe vetëm vende-vende priten riga lokale shiu. Erërat do të ndryshojnë drejtim dhe do të fillojnë të fryjnë nga veriu dhe verilindja, megjithatë fronti do të jetë i dobët dhe jetëshkurtër. Vende-vende të martën pasdite vonë do të ketë riga lokale shiu të cilat nganjëherë mund të paraqiten edhe të mërkurën lokalisht. Ulja e temperaturave nga ky front do të jetë krejtësisht e lehtë.
Sidoqoftë, fronti do të sjellë vranësira dhe riga lokale shiu gjatë së martës vonë dhe së mërkurës, por nuk do të ndikojë shumë në ndryshimin e kushteve të përgjithshme të motit, ngase pas frontit do të pasojë stabilizimi i motit dhe “pushteti absolut anticiklonik”.
Fundi i Dhjetorit dhe fillimi i Janarit nuk do të jetë shumë shpresdhënës për entuziastët e dimrit apo reshjeve të borës, ngase ende do të jemi nën ndikimin e plotë të anticiklonit afrikan./MeteoBallkan
