Më shumë se 2,000 njerëz pësuan përkeqësim të gjendjes për shkak të nxehtësisë gjatë pelegrinazhit të Haxhit, thanë zyrtarët sauditë të enjten, pasi temperaturat u rritën në 48 gradë Celsius.
Mbi 1.8 milionë besimtarë myslimanë kryen haxhin njëditor, kryesisht të mbajtur jashtë në kulmin e verës së shkretëtirës saudite. Shumë të moshuar ishin në mesin e pelegrinëve pasi u hoq kufiri maksimal i moshës.
Zyrtarët sauditë thanë se rreth 1700 raste të përkeqësimit të gjendjes për shkak të nxehtësisë u regjistruan të enjten – pasi një numër i madh pelegrinësh mbeten në vendet e shenjta një ditë pas përfundimit të ritualeve kryesore – shtuar në 287 të raportuar më parë.
“Numri i rasteve të stresit të nxehtësisë që nga fillimi i kësaj dite ka arritur në 1,721”, tha ministria saudite e shëndetësisë, duke u kërkuar njerëzve që të qëndrojnë larg diellit dhe të pinë shumë ujë.
Zyrtarët nuk dhanë një numër të vdekjeve, por të paktën 230 njerëz – shumë nga Indonezia – vdiqën gjatë pelegrinazhit, sipas numrave të shpallur nga vende të ndryshme të cilat nuk renditën shkaqet e vdekjes.
Sipas konsullit të përgjithshëm të Indonezisë, vendi më i madh mysliman në botë, të paktën 209 indonezianë vdiqën gjatë haxhit.
“Është e pasaktë të thuhet se shumë pelegrinë indonezianë vdiqën për shkak të goditjeve të të nxehtit”, tha Eko Hartono, duke shtuar se shkaqet e vdekjes ishin kryesisht për shkak të sëmundjeve të zemrës dhe të frymëmarrjes.
Haxhiu më i vjetër i Iranit këtë vit, 114 vjeç, vdiq nga një atak në zemër, tha agjencia gjysmë zyrtare e lajmeve Fars, duke raportuar 10 vdekje iraniane.
Tetë algjerianë dhe katër marokenë vdiqën, thanë zyrtarët, ndërsa një media egjiptiane pro-qeveritare tha se tetë pelegrinë nga vendi kishin vdekur.
Qindra njerëz u trajtuan për probleme të zemrës, duke përfshirë një burrë 78-vjeçar filipinas, i cili pati një operacion të suksesshëm në zemër të hapur në Mekë, tha ministria e shëndetësisë.
Shifra reale për stresin e nxehtësisë – që përfshin goditjen nga nxehtësia, rraskapitja, ngërçet dhe skuqjet – është ndoshta shumë më e lartë, pasi shumë të sëmurë nuk u shtruan në spitale apo klinika, raporton The Guardian.
