Organizata e Kombeve të Bashkuara që merret me monitorimin e motit po paralajmëron qeveritë dhe organizatat humanitare që të përgatiten për “ngjarje ekstreme të motit”, përfshirë valë të të nxehtit, thatësira dhe reshje të dendura, si pasojë e fenomenit klimatik El Niño.
Organizata Botërore Meteorologjike (WMO) njoftoi të premten se kushtet e El Niños tashmë janë krijuar dhe parashikohet të forcohen me shpejtësi gjatë periudhës korrik–shtator.
El Niño zakonisht arrin kulmin ndërmjet muajve nëntor dhe shkurt.
Agjencia e OKB-së ka aktivizuar shërbimet e informacionit klimatik dhe sistemet e paralajmërimit të hershëm për t’i ndihmuar qeveritë dhe organizatat humanitare të përgatisin plane mbështetëse për fermerët dhe komunitetet më të cenueshme.
“Kushtet e El Niños tashmë janë në zhvillim dhe parashikohet të forcohen me shpejtësi duke u shndërruar në një ngjarje të fortë, ashtu siç ishte parashikuar saktë nga prognozat e WMO-së”, tha Sekretarja e Përgjithshme e WMO-së, Celeste Saulo.
“Kjo do të rrisë mundësinë e thatësirave dhe reshjeve të dendura, si dhe rrezikun e valëve të të nxehtit në tokë dhe në det në shumë rajone të botës.”
Saulo shtoi se “parashikimet sezonale të avancuara dhe paralajmërimet e hershme janë jetike për të shpëtuar jetë dhe për të zbutur ndikimin në ekonomitë dhe komunitetet tona.”
El Niño është një fenomen natyror klimatik që ngroh temperaturat sipërfaqësore në pjesën qendrore dhe lindore të Oqeanit Paqësor ekuatorial, duke shkaktuar ndryshime në mbarë botën në erëra, presionin atmosferik dhe modelet e reshjeve.
Ngjarjet e El Niños zakonisht ndodhin çdo dy deri në shtatë vjet dhe zgjasin nga nëntë deri në dymbëdhjetë muaj. Jo të gjitha rajonet e botës preken prej tij.
Kushtet klimatike luhaten mes El Niños dhe të kundërtës së tij, La Niña – të dyja faza të Lëkundjes Jugore El Niño (ENSO) – me periudha neutrale ndërmjet tyre
