Sot në Kosovë pritet të mbajë mot mjaft i nxehtë dhe me zagushi. Përpos diellit do të ketë edhe vranësira lokale, ndërsa në disa zona kryesisht malore do të ketë gjasa edhe për ndonjë rigë apo rrebesh shiu me ndonjë vetëtimë dhe bubullimë.
Temperaturat do të shënojnë ulje të lehta dhe ato maksimale pritet të arrijnë deri në 35 gradë Celsius.
Në Shqipëri të Enjten pritet të mbajë mot me diell por edhe me shtim të konsiderueshëm të vranësirave të cilat në disa zona do të zhvillohen fuqishëm duke gjeneruar stuhi të izoluara kalimtare shiu me vetëtima dhe bubullimë. Temperaturat do të fillojnë të ulen por në disa zona ende mbetet shumë nxehtë sidomos në veriperëndim të vendit.
Rrebeshe të izoluara kalimtare të Enjten mund të ketë edhe në perëndim të Maqedonisë së Veriut dhe Mal të Zi.
Ditëve të ardhshme temperaturat do të shënojnë ulje graduale. Në Kosovë deri të dielën kryesisht pa reshje, por në disa zona mund të ketë rrebeshe të izoluara shiu me vetëtima dhe bubullimë. Të dielën rrebeshet mund të jenë më të përhapura.
Në viset tjera orëve të pasdites do të ketë më shumë gjasa për zhvillime të stuhive të izoluara të shiut me vetëtima dhe bubullimë.
Të Dielën dhe të Hënën pritet destabilizim më i fuqishëm i motit në të gjitha viset./MeteoBallkan
