Ajri në kryeqytet është rikthyer të jetë mjaft i dëmshëm, siç po ndodhë shpesh në Kosovë gjatë dhe para stinës së dimrit për shkak të ndikimit të masave ajrore anticiklonike të cilat ndikojnë në dobësimin e qarkullimit të përgjithshëm të ajrit
Momentalisht, Prishtina renditet në top dhjetëshen e qyteteve me ajrin më të ndotur në botë, shkruan Gazeta Sinjali.
Pakistani, India, Bangladeshi, Vietnami, Kina, Mongolia e Nepali janë shtetet e vetme ku ajri është më i ndotur sesa në Kosovë.
Sipas matjeve momentale, norma e cilësisë së ajrit në Prishtinë është 162, që konsiderohet i pashëndetshëm.
Për ajrin e pashëndetshëm në kryeqytet sot kanë alarmuar edhe katër monitorët e vendosur për publikimin e të dhënave të cilësisë së ajrit në Prishtinë.
Cilësia e tmerrshme e ajrit gjatë dimrit është përcjellur edhe me protesta të banorëve të Prishtinës.
Ndonëse sipas Komunës së Prishtinës ende nuk dihen shkaktarët e ndotjes së ajrit, shumë banorë mendojnë se qymyri i shumtë që përdoret në kryeqytet gjatë sezonit të dimrit, është shkaktari kryesor i ndotjes.
Sipas një raporti të vitit të kaluar të publikuar nga Agjencia Europiane e Mjedisit, Kosova kryeson në Evropë për vdekjet nga ndotja e ajrit /Gazeta Sinjali/
