Pas reshjeve të shiut të cilat erdhën me bereqet të madh duke zbutur sadopak thatësinë ekstreme dhe duke ulur temperaturat tani kemi përmirësim afatshkurtër të kushteve të motit.
Vranësirat do të largohen edhe nga Kosova dhe Maqedonia Veriore, sepse tani në Shqipëri kemi intervale kohore me diell. Kthjellimi i motit nuk do të jetë i plotë sepse mbesin vranësira lokale. Temperaturat do të shënojnë rritje graduale.
Megjithatë me përmirësimin e motit dhe largimin e vranësirave, njëkohësisht një tjetër front i ftohtë ajror nga Atlantiku depërton në Alpet dhe veri të Italisë. Ky front ajror do të jetë mjaft i fuqishëm dhe me energjik duke provokuar krijimin e një super-cikloni në Gjirin e Gjenoves së Italisë.
Ky ciklon i ri i krijuar në veri të Italisë do të jetë shumë i pasur me lagështi duke iu falënderuar edhe temperaturave të larta të ujërave të Mesdheut.
Si pasojë, priten reshje të reja shiu në gati tërë Ballkanin, vende-vende shumë të fuqishme dhe intensive.
Reshje të mëdha dhe intensive fillimisht priten në Slloveni, veri të Italisë, bregdetin kroat e Të Enjten deri në bregdetin shqiptar në veriperëndim të vendit ku pritet që reshjet të rifillojnë. Reshje të fuqishme pastaj priten në Hercegovinë dhe Mal të Zi.
E Enjta pasdite në territoret tona sjellë rrebeshe në veri të Shqipërisë dhe aty këtu në viset tjera të pakta. Erërat jugore do të fuqizohen dhe temperaturat do të rriten sepse cikloni gjenovian afrohet më shumë viseve tona duke shtyrë ajrin e nxehtë në drejtim të viseve tona. Pas fillimit të reshjeve temperaturat fillojnë të ulen dhe pastaj fillojmë të kalojmë në sektorin e ftohtë të temperaturave.
Pra, të fokusohemi në viset tona, fillimisht priten reshje shiu në veri të Shqipërisë dhe Mal të Zi, pastaj nga e Premtja reshjet dhe rrebeshet e shiu shtrihen dhe përhapen në tërë Shqipërisë, pastaj në Kosovë, Maqedoninë Veriore dhe Luginën e Preshevës. Në të gjitha viset priten reshje shiu, vende-vende më intensive në formë të rrebesheve me vetëtima dhe bubullimë.
Fundjava sjellë ulje të ndjeshme të temperaturave, vranësira dhe herë pas here reshje shiu. Reshjet do të vazhdojnë në disa zona me intensitet të lartë duke krijuar probleme afatshkurtra, por në shumicën e zonave reshjet nuk do të jenë pa ndërperje.
Pra, për fund: po vjen përmirësimi i motit i cili nuk do të zgjasë shumë. Nesër e Enjte rrebeshe shiu ri-fillojnë në veri të Shqipërisë, por më të dobëta edhe në jug. Pasnesër e Premte rrebeshe shiu priten në të gjitha viset tona. Për fundjavë ulje e ndjeshme e temperaturave, në bregdet me rrebeshe të herëpashershme shiu, ndërsa në viset kontinentale me reshje shiu dhe atmosferë vjeshte. Në viset më të larta malore do të ketë gjasa për fjollat e para të borës për këtë sezonë. Fjolla bore priten në malet e Bosnjës dhe Hercegovinës, pastaj në malet t Malit të Zi.
Në fund edhe në malet e larta të Rugovës, pastaj në Sharr dhe malet e larta të Maqedonisë së Veriut./MeteoBallkan
