Ata që zgjohen herët do të kenë një kënaqësi të rrallë nga e premtja, kur pesë planetë parashihet të rreshtohen në një mënyrë të veçantë për herë të parë në 18 vjet.
Mërkuri, Venera, Marsi, Jupiteri dhe Saturni do të rreshtohen sipas distancës së tyre nga dielli, siç shihet nga hemisfera veriore dhe mund të dallohen në qiell para agimit, shkruan “The Guardian” të enjten.
Nuk është e pazakontë të shohësh dy ose tre planetë afër njëri-tjetrit, por kjo është hera e parë që pesë prej tyre mund të shihen nga Britania në këtë shtrirje të veçantë që nga dhjetori i vitit 2004.
E ashtuquajtura “Parada e planetit” do t’i bëjë të dukshme Merkurin, Venera, Marsin, Jupiterin dhe Saturnin për syrin e lirë në hapësirën juglindore të qiellit, para agimit.
Merkuri do të jetë më i dobëti dhe mjaft afër horizontit kur shfaqja të fillojë më 3 qershor, përpara se të zhduket në shkëlqimin e dritës së lindjes së diellit, por do të jetë më e lehtë për t’u dalluar me kalimin e muajit.
Greg Brown, zyrtar publik i astronomisë në Muzeun Mbretëror të Greenwich në Britani ka thënë se nga të gjithë planetët, më së lehti do të mund të vërehen Venera dhe Jupiteri.
Venera do të dalë mbi horizont rreth orës 04:00 sipas kohës lokale të Britanisë, derisa Jupiteri rreth orës 02:45.
Saturni, i cili ngrihet mbi horizont rreth orës 01:30, do të jetë i vështirë për t’u parë në muzg, së bashku me Marsin, ndërsa më i vështiri për t’u dalluar do të jetë Merkuri sepse ai ngrihet rreth orës 04:30 sipas kohës lokale në Britani dhe mbetet afër horizontit.
“Shansi juaj i vetëm për t’i parë të pesë planetët në të njëjtën kohë është pasi Merkuri të ketë lindur, por para se të ketë dalë dielli”, tha Brown për “The Guardian”.
Një palë dylbi ose një teleskop mund të mjaftojë për të kapërcyer muzgun në rastin e planetëve më të zbehtë, por jini shumë të kujdesshëm kur përpiqeni të vëzhgoni veçanërisht Merkurin në këtë mënyrë, ka sugjeruar Brown.
Pesë planetët do të shkëlqejnë me radhë, sepse të gjithë udhëtojnë në rrafshin e sistemit diellor, i njohur si ekliptika.
