Fronti i mbrëmshëm solli ulje të temperaturave dhe vende-vende rrebeshe shiu me vetëtima dhe bubullimë. Në disa vise u regjistruan stuhi të fuqishme me breshër siç ishte rasti në Kaçanik, por edhe në disa vise tjera, megjithatë mbetet problematike gjendja me thatësinë për ato zona të cilat nuk përfituan reshje shiu.
Nga sot mbi rajonin tonë do të forcohet ndikimi i mases stabile ajrore anticiklonike. Kjo masë ajrore është krejtësisht e thatë dhe për këtë arsye nuk parashihen më (këto ditë) reshje atmosferike.
Temperaturat pritet të fillojnë të rriten përsëri, ndërsa nata e sontme pritet të jetë e ftohtë, madje në nivel rajoni pritet edhe brymë si në veri të Malit të Zi, jugperëndim të Serbisë dhe juglindje të Bosnjës. Nuk përjashtohet mundësia që brymë të ketë edhe në disa vise malore në territoret tona mëngjesin e hershëm të së enjtes.
Të shtunën temperaturat pritet që përsëri të arrijnë deri në 30 gradë Celsius, ndërsa të dielën ulje të lehta të temperaturave dhe mundësi për rrebeshe lokale shiu të cilat nuk do të jenë gjithëpërfshirëse dhe fatkëqësisht gjendja me thatësinë vetëm se do të përkeqësohet./MeteoBallkan
