Probleme në qarkullim, vërshime e përmbytje, dëme në amvisëri e bujqësi. Po ashtu edhe mungesë të ujit. Shi bjen, por ujë nuk ka. Apo ujë ka, por ai nuk mund të pihet e mbase as shfrytëzohet për përdorim.
Të gjitha këto telashe, nuk po ndodhin për herë të parë, qytetarët ballafaqohen me një gjë të tillë sa herë që ka reshje, përcjell klankosova.tv.
Dhe zgjidhja, është gjë kundi!
Ndonëse irritimi i qytetarëve rritet, e njëjta nuk mund të thuhet për përgjegjësinë institucionale.
Me mungesë të ujit po përballen komuna e Fushë Kosovës, Drenasit, Obiliqit dhe një pjesë e lagjes Kalabria në kryeqytet. Ndërkohë që edhe disa fshatra të Gjakovës, po përballen me telashet me ujin.
Deri tek ndërprerja e furnizimit me ujë, nga KRU Prishtina, i kanë thënë Klan Kosovës, se ka ardhur për shkak të nivelit të lartë të turbullirës që bën të pamundur trajtimin e ujit për pije konform standardeve dhe teknologjisë që KRU posedon.
Zëdhënësja e këtij institucioni, Arjeta Mjeku, tha se si pasojë e reshjeve të dendura të shiut ditët e fundit, janë rritur edhe rrjedhjet sipërfaqësore në zonat fushore dhe pastaj të njëjtat në disa raste kanë përfunduar te kanali i Ibër Lepencit, kanal prej të cilit merret uji i pa përpunuar për t’u trajtuar pastaj për pije.
E nga Iber Lepenci, kanë deklaruar se: “Meqënese kanali ështe i tipit të hapur, është vështirë që të mbrohet nga ndikimi i natyrës/të reshurave në sasi kaq të mëdha. Jemi të vetëdijshëm edhe për problemet që mund të ndodhin edhe tek ujesjellësat rajonal, dhe na vjen keq për situatën e krijuar, por ju garantojmë që jemi në përpjekje maksimale që t’i zbusim këto ndikime”.
Sipas tyre, reshje me intensitet kaq të lartë, ka vite që nuk ka pasur.
Sa i takon Komunës së Gjakovës, KRU Gjakova ka njoftuar se atje ka përmirësim të situatës.
“Në burimin e bjeshkës së Babaj të Bokes ku furnizohen 34 fshatra te Rekës së Keqe, të dielën nga ora 14:00 kanë qenë pa ujë deri të hënën rreth orës 08:30 ku kemi fillu me furnizu atë zonë pasiqë intensiteti i shirave është zvoglu dhe turbullira ka rënë dukshëm-pastaj është fut në filtra dhe çdo gjë është në rregull për momentin”, kanë thënë për Klan Kosova nga zyra për informim e KRU Gjakova.
Ndërkaq për burimin e fshatit Gërçinë, thonë se nga e diela uji ka turbullsi dhe ende vazhdon edhe të hënën të jetë i pashfrytëzueshëm për pije e poashtu edhe në stacionin e pompave në Brekoc, për shkak të futjes së shirave në rezervoarin e pompave thithëse, për momentin uji është i papërdorshëm për pije.
Ndërkohë edhe QRSHP në Pejë, ka njoftuar se janë në bashkëveprim dhe në kontakt të vazhdueshëm me KRU Hidrodrini – Pejë.
Situata është nën kontrollë dhe monitorim të vazhdueshëm me mostrimin e ujit për pije, thuhet mes tjerash.
Rekomandimet e përgjithshme që ata kanë dhënë deri në një njoftim tjetër janë:
- Uji para përdorimit të vlohet
- Të konsumohet uji për pije nga resurset e sigurta ose uji i ambalazhuar
Ndërkohë, deri në një zgjidhje të kësaj çështjeje, qytetarëve iu mbetet të gjejnë alternativa tjera të furnizimit me ujë./KlanKosova
