Masa të ftohta ajrore me origjinë polare do të depërtojnë në drejtim të Evropës perëndimore, qendrore dhe jugperëndimore deri në Gadishullin Iberik duke kushtëzuar reshje bore, përpos viseve malore edhe nëpër shumë ultësira të Evropës.
Reshje bore priten që nga Gjermania, Çekia, Zvicra Franca etj. deri në Britaninë e Madhe dhe Spanjë. Reshje të dendura bore priten në Alpe dhe Pirenej , por edhe nëpër shumë ultësira të Evropës priten reshje bore në sasi të ndryshme.
Në rajonin tonë do të vazhdojnë të dominojnë rrymat e ngrohta nga Mesdheu dhe Afrika Veriore dhe për këtë arsye priten reshje shiu, ndërsa reshje bore vetëm nëpër male, por me kalimin e ditëve masat e ftohta ajrore me origjinë polare fare lehtë mund të depërtojnë edhe në rajonin tonë dhe të na sjellin reshje bore.
Pra, njëherë për njëherë reshje bore priten në Evropë, ndërsa tek ne vetëm reshje shiu të cilat nganjëherë mund të përzihen me bore. Këtë e favorizon gjendja sinoptike e cila nuk lejon depërtimin e ajrit të ftohtë ende në drejtim të rajonit tonë, megjithatë gjendja është premtuese për muajin Janar sepse afërsisht nga mesi i Janarit parashihet që temperaturat polare dhe siberike të vijnë edhe tek ne duke na “premtuar” pamje dimërore, por për këtë duhet të jemi të durueshëm dhe të presim se si po zhvillohet evoluimi i gjendjes sinoptike./Meteoballkan
