Pas një pauze të shkurtër sonte në mbrëmje dhe gjatë natës do të kemi rikthimin e reshjeve atmosferike në Kosovë. Nëpër ultësira do të ketë kryesisht reshje shiu, kurse në viset kodrinore-malore reshje bore. Gjatë orëve të hershme të mëngjesit të nesërm reshje dëbore ose të përziera me shi mund të ketë edhe në disa ultësira të Republikës së Kosovës përveç rajonit të Dukagjinit ku gjasat janë shumë më të vogla.
Reshjet do të vazhdojnë edhe gjatë tërë ditës së nesërme me intensitet kryesisht të dobët dhe mesatar. Përsëri dhe “çuditërisht” reshje më intensive priten në lindje të vendit pra në rajonin e Anamoraves, por edhe në veri dhe verilindje.
Reshje priten edhe në Maqedoninë Veriore dhe veriun e Malit të Zi, kurse në ShqipëRi reshjet do të jenë të karakterit lokal në formë të rrebesheve afatshkurta lokale.
Të mërkurën do të kemi stabilizim të plotë të motit dhe ngritje të temperaturave, kurse të enjtën na pret ditë e vërtetë pranverore me diell dhe temperatura afër 20 gradë Celsius./Meteoballkan
