Masat e fuqishme ciklonike që nga nesër do të fillojnë të përfshijnë edhe territoret tona do të kushtëzojnë reshje mjaft intensive atmosferike në Ballkan duke zbutur në mënyrë substanciale thatësirën e madhe, por jo në krejt territorin, ngase reshjet më së shumti do të ndodhin përgjatë bregdetit të Adriatikut nga Sllovenia e deri në Detin Jon në brigjet e Greqisë. Në viset kontinentale priten më pak reshje, megjithatë vende-vende nuk duhet nënvlerësuar sasinë e reshjeve në zonat kontinentale.
Reshje të dendura priten në Mal të Zi dhe shumë pjesë të Shqipërisë, sidomos në veriperëndim, pjesë të qendrës dhe pjesë të jugut të vendit. Po ashtu edhe në shumë pjesë të Dukagjinit priten reshje herë pas here të dendura, por më pak krahasuar me viset bregdetare.
Bazuar në ecuritë aktuale sinoptike shumë pak reshje priten në disa vise në qendër dhe në juglindje të Maqedonisë së Veriut, për tu pasuar nga juglindja e Shqipërisë dhe po ashtu edhe disa vise në pjesët qendrore dhe lindore të Kosovës, por sasia e reshjeve ende mund të ndryshojë në disa nuanca dhe për këtë do të mundohemi të jemi aktiv për lajmet më të fundit sa i përket ecurive meteorologjike në vend dhe rajon./MeteoBallkan
