Masa e ftohtë ajrore që erdhi nga lindja e Kontinentit uli temperaturat dhe solli edhe reshjet e para të borës në shumë zona kodrinore-malore të Kosovës. Kjo masë e ftohtë ajrore dinamizoi atmosferën pas një kohe të gjatë monotonie meteorologjike. Ndikimi anticiklonik tani u zbeh për ende nuk priten reshje të mëdha.
Ndërkohë që në Mesdhe po dominojnë masat ajrore ciklonike, kjo masë e ftohtë ajrore do të aktivizojë edhe më shumë Mesdheun duke krijuar kushte për krijimin e cikloneve të reja me reshje shiu e bore. Ndërkohë, edhe një front tjetër i ftohtë vjen nga verilindja duke krijuar një ciklon të fuqishëm në Detin Jon.
Ky ciklon sipas parashikimeve më të fundit pritet të sjellë reshje të dendura shiu, por edhe bore. Shi në Shqipëri dhe borë në Kosovë natën e së mërkurës dhe mëngjesin e së Enjtes. Herë pas here në Kosovë priten reshje të dendura bore që do të mund të krijonin edhe shtresa bore, madje edhe në zonat urbane. Reshje bore priten në Kosovë dhe viset kodrinore-malore të Maqedonisë së Veriut dhe verilindjes-lindjes së Shqipërisë.
Gjithnjë sipas parashikimeve të të fundit të Modelit Evropian ECMWF dhe atij britanik UKMO cikloni do të zhvendoset shpejtë në drejtim të Greqisë dhe Turqisë dhe ndikimi i tij më i madh do të jetë mëngjesin e së Enjtes.
Sidoqoftë, ende mund të ketë ndryshime në parashikim, ngase çdo ndryshim edhe më i vogël i pozicionit të ciklonit mund të ndryshojë tërësisht sasinë dhe përbërjen e reshjeve atmosferike, por sipas ecurive aktuale të cilat japin sinjal shumë të fortë se në shumë pjesë të Kosovë priten reshje bore, herë pas here intensive mëngjesin e hershëm të së Enjtes.
Të dhënat sinoptike ende janë në evoluim e sipër dhe për çdo ndryshim eventual ne do tju njoftojmë me kohë, por tani për tani gjasat i kemi të forta për reshje bore paksa më intensive mëngjesin e hershëm të së Enjtes./MeteoBallkan
