Ky anticiklon dukej sikur nuk po i shihej fundi, megjithatë tani kemi disa sinjale më serioze për dobësimin e tij dhe ardhjen e një mase ajrore nga Mesdheu perëndimor direkt nga Italia në Ballkan.
E kemi sqaruar anticiklonin masiv ruso-skandinav dhe ciklonin thellë në Mesdheun perëndimor. Këto masa ciklonike më në fund po parashihen që gjatë mesit të javës së re të arrijnë të depërtojnë në viset tona dhe të kushtëzojnë ndryshim të motit, shtim të vranësirave të reshjeve atmosferike të cilat mund të jenë edhe në formë dëbore. Kjo do të varet nga rezistenca e ajrit të ftohtë polar që ndodhet në trojet tona dhe eventualisht depërtimi i ndonjë sasie të re të të ftohtit polar në kombinim me këto masa nga Mesdheu mund të kushtëzojnë reshje shiu e bore. Shi në Shqipëri e borë në Kosovë. Fjala është për mesin e javës së re.
Jemi në fazen e fundit të dimrit kur mund të kemi ndonjë goditje të fortë, ose eventualisht të dalim direkt në pranverë, prandaj modelet janë duke u përpjekur për të deshifruar ecuritë sinoptike nga ekstremi në ekstrem duke simuluar goditje të fortë dimërore e në anën tjetër duke simuluar ardhjen e temperaturave pranverore, prandaj për momentin asnjëri opsion nuk qëndron dhe janë thjeshtë lajthitje.
Sodoqoftë, deri në mesin e javes së re mbesim nën mbretërimin absolut anticiklonik, pastaj do të kemi ndryshim të situates sinoptike me reshje shiu e bore për shkak të dobësimit të anticiklonit dhe depërtimeve nga Mesdheu, por edhe kjo do të ketë ndryshime si në fuqinë e saj ashtu edhe në precizitet. Sinjali është dukshëm i fortë dhe ne mbetet të ndjekim evoluimin e gjendjes sinoptike nga përditësimet e vazhdueshme të modeleve globale për parashikim të motit./MeteoBallkan
