Masa ajrore polare sonte është e koncentruar pikërisht mbi rajonin tonë, ndërsa moti është me khtjellime dhe vranësira më të pakta lokale. Vranësirat edhe ato të pakta dhe lokale pritet të tërhiqen plotësisht dhe do të pasojë kthjellimi i plotë i qiellit dhe për këtë arsye acari do të jetë i fortë sidomos orëve të hershme të mëngjesit. Vetëm ato rajone ku eventualisht do të mbetet ndonjë vranësirë mund të “shpëtojnë” më lehtë.
Sidoqoftë, në Kosovë temperatura në shumë vise do të zbres deri në -10 gradë Celsius. Orët e hershme të mëngjesit në disa zona temperatura mund të ulet edhe më shumë deri në -12 gradë Ceslius, ndërsa në zonat malore edhe më shumë.
Vlenë të përmendet veriu i Malit të Zi ku temperatura minimale do të zbresë të paktën deri në -20 gradë Celsius.
Acar i madh edhe në Malet e Shqipërisë dhe Maqedonisë së Veriut, por edhe në disa ultësira.
Dita e nesërme vijon me diell, ndërkohë që do të ketë shtim gradual të vranësirave. Në mbrëmje vonë vranësira nga Mesdheu arrijnë duke sjellur edhe reshje bore shqote dhe shiu të ngrirë, ngase këto vranësira parashihet të ndeshen me mbetjet e ajrit të ftohtë polar, megjithatë me depërtimin më të thellë të ciklonit i cili transporton masa më të ngrohta ajrore nga Mesdheu bora do të shndërrohet në shi gjatë mëngjesit ose ditës së martë.
Të mërkurën rikthehen masat e ftohta dhe reshjet e shiut do të shndërrohen përsëri në borë, por jo në tërë vendin dhe reshjet e borës do të jenë lokale.
Në Shqipëri të martën priten reshje intensive shiu dhe rrebeshe intensive me vetëtima dhe bubullimë, ndërsa të mërkurën reshjet rrallohen dhe mbeten prezente vetëm në disa tona si reshje sporadike shiu./MeteoBallkan
