Intervalet kohore me diell janë shtuar në Kosovë pas një dite me re të dendura dhe reshje. Edhe temperatura ka shënuar rritje, por ende nuk ka nxehtësi verore. Zagushi ështe kombinimi i rrezeve diellore dhe lagështisë së lartë relative të ajrit.
Më së shumti jo-stabilitete sot ka në juglindje të Shqipërisë, pastaj edhe në disa vise në jug të dhe qendrë të vendit si dhe në disa vise të Maqedonisë së Veriut. Duke pas para sysh territorin e madh të këtyre dy shteteve këto zhvillime duken të vogla, por në realitet në ato rajone ku po ndodhin janë mjaft të fuqishme.
Në Kosovë ka rrebeshe të izoluara dhe afatshkurtra shiu, por në shumicën e territorit sot nuk ka reshje.
Edhe nesër vazhdon mot ngjashëm, me më shumë intervale kohore me diell dhe zhvillime të izoluara të ndonjë stuhie, gati në zonat e njëjta sikur sot.
Nga e enjta do të depërtojnë masa të reja ajrore jo-stabile të cilat pritet të destabilizojnë atmosferën kryesisht pasditeve dhe mbrëmjeve. Priten intervale të gjata kohore me diell dhe zagushi, ndërsa pasditeve vende-vende rrebeshe shiu me vetëtëtima, bubullimë dhe mundësi për breshër afatshkurtër.
Sipas ecurive aktuale përmirësim më afatgjatë të motit mund të kemi afër datës 18 Qershor për shkak të mundësisë së zhvillimit të një anticikloni stabil mbi rajonin tonë, por kjo është vetëm një sinjal dhe ende nuk ka asgjë të sigurtë./Meteoballkan
