Me rritjen e temperaturave në territoret tona gjatë kësaj fundjave po na pret mot kryesisht stabil dhe me diell. Rrebeshe të izoluara priten vetëm në disa zona malore dhe shumë rrallë në ndonjë zonë tjetër.
Megjithatë, një fronti i fuqishëm i ftohtë ajror po depërton në Ballkan edhe pse shumë gradualisht.
Fronti i ftohtë ajror do të arrijë ditën e Hënë në viset tona, prandaj deri të Hënën na pret mot kryesisht stabil dhe me diell, për dallim nga shumë vise të Ballkanit sidomos Slloveni, shumë pjesë të Kroacisë dhe Bosnjës e Hercegovinës vende ku rrebeshe të fuqishme shiu priten edhe gjatë fundjavës apo vikendit.
Të Hënën ajri mjaft jo-stabil përfshin edhe territoret tona me zhvillime mjaft intensive të vranësirave dhe rrebesheve të shiut me vetëtima dhe bubullimë.
Kësaj radhe priten zhvillime të fuqishme konvektive dhe lloje tjera të vranësirave që do të kushtëzojnë shtrëngata intensive shiu me vetëtima, bubullimë dhe lokalisht mund të ketë edhe breshër.
Me ardhjen dhe zhvilimin e vranësirave të dendura dhe rrebesheve intensive do të ketë ulje të ndjeshme të temperaturave, por deri të Hënën kënaquni me motit me diell dhe stabil.
Ky sistem atmosferik do të jetë mjaft i pasur me lagështi për dallim nga sistemet tjera që sivjet ishin krejtësisht të thatë dhe shumë pak sollën reshje atmosferike.
Rrebeshe mjaft intensive priten në shumë pjesë të Kosovës, Maqedonisë së Veriut, Luginës së Preshevës, Malit të Zi dhe më pak priten në Shqipëri, por në disa vise kontinentale do të ketë edhe në Shqipëri me intensitet më të lartë. Edhe në viset bregdetare priten rrebeshe kalimtare shiu.
Sipas ecurive aktuale sinoptike reshjet që priten të Hënën edhe pse të vonshme do të ndikojnë pozitivisht sadopak në situatën e rënduar hidrologjike në Republikën e Kosovës.
Thatësia është e madhe dhe intensive dhe duhen reshje disaditore për ta eliminuar thatësinë, megjithatë mund të kemi zbutje të saj gjatë ditës së Hënë.
Pra, pas një fundjavë të nxehtë e Hëna fillon me stuhi të izoluara fillimisht dhe pastaj gjatë ditën priten zhvillime shumë më intensive dhe rrebeshe shumë më të përhapura shiu me vetëtima dhe bubullimë.
Gjithnjë sipas ecurive aktuale sinoptike pas reshjeve që priten të Hënën, nga e Marta pritet stabilizim gradual i atmosferës./MeteoBallkan
