Atmosfera ka “përshkallëzuar” energjinë e vet nëpër rajonin tonë por pak më larg territoreve tona. Stuhi të fuqishme janë duke u zhvilluar gjatë tërë pasdites së sotme veçanërisht në territorin e Bosnjës dhe Hercegovinës, por lokalisht që nga Sllovenia, Kroacia, Mali e Zi e deri te Serbia. Ky destabilizim i atmosferës vetëm se do të përkeqësohen ose do të përshkallëzohet sonte gjatë mbrëmjes dhe gjatë natës, ku disa stuhi me vetëtima do të përfshijnë edhe territorin e Republikës së Kosovës dhe Shqipërisë. Stuhitë pritet të jenë të karakterit lokal, pra disa rajone do preken dhe disa jo dhe këtë nuk mund të përcaktojë askush me saktësi absolute, por prirjet janë që veriu dhe verilindja e Kosovës të preken përsëri, normalisht duke mos përjashtuar edhe rajonet tjera lokalisht.
Përderisa institucionet rajonale për parashikim të motit për Bosnjën dhe Serbinë kanë ngritur alarmin e kuq, Kosova gjendet në ngjyrën e portokalltë, me rrezikshmëri më të vogël, megjithatë MeteoBallkan rekomandon që të kemi kujdes sepse siç u vërtetua edhe mbrëmë stuhitë verore nganjëherë janë të paparashikueshme dhe të befasishme në intensitet.
Sidoqoftë sonte përsëri vende-vende në Kosovë priten rrebeshe lokale shiu me vetëtima dhe bubullimë. Disa nga stuhitë mund të jenë potencialisht të fuqishme, me erëra, breshër dhe vetëtima dhe bubullimë intensive. Stuhi afatshkurtra por intensive pritet të përfshijnë edhe disa rajone në Shqipëri duke përfshirë edhe bregdetin verior dhe në qendër.
Mot jo-stabil pritet edhe gjatë natës dhe nesër, kurse nga e enjta do të kemi stabilizim të motit./Meteoballkan