Masa mjaft jo-stabile ajrore me origjinë nga Oqeani Atlantik po mbizotërojnë në Evropë, Mesdhe dhe pjesë të Ballkanit. Këto masa ajrore ciklonik po qarkullojnë që nga Spanja veriore e sidomos Franca dhe Gjermania e deri në pjesët qendrore të Evropes dhe Ballkan. Më së shumti reshje priten në Italinë veriore, por duke mos anashkaluar pjesë të Francës e sidomos jugperëndimi i Gjermanisë dhe rajonet përreth. Në Ballkan temperaturat do të fillojnë të rriten ndjeshëm dhe kjo do të jetë një infuzion për krijimin e stuhive apo shtrëngatave të fuqishme lokale dhe sistmeve të fuqishme frontale.
Një apo disa sisteme të fuqishme frontale me shtrëngata të fuqishme parashihet të krijohet të Enjten, por me efekte jo aq të mëdha në viset tona, megjithatë priten rrebeshe lokale, kalimtare shiu me vetëtima dhe bubullimë.
Zhvillimet masive konvektive do të fuqizohen sidomos në territorin e Bosnjës dhe Hercegovinës, pastaj në jugperëndim të Serbisë, kurse shtrëngata të forta me reshje e rrebeshe shumë intensive parashihen të Enjten vonë në territorin slloven dhe kroat. Pastaj, rrebeshe shumë të fuqishme shiu priten edhe në veri të Italisë, Hungari dhe shumë vise tjera në qendër të Evropes.
Këto zhvillime të bujshme atmosferike do të vijnë nganjëherë edhe në viset tona ngase këtë fundjavë do të kemi rritje të ndjeshme të temperaturave dhe me prezencën e masave mjaft jo-stabile ajrore do të krijohen kushte për shtrëngata dhe rrebeshe intensive.
Pra, stuhi dhe reshje intensive fillimisht priten në pjesë të Ballkanit dhe Evropes që i përmendëm më lartë, kurse edhe viset tona nuk do të jenë imune ndaj këtyre zhvillimeve. Nga nesër e Enjte do të kemi rritje të temperaturave e sidomos për vikend, ndërsa shtrëngata të fuqishme mund të kemi të dielën vonë pasdite ose në mbrëmje.
Informacione dhe detaje tjera në postimet tona të ardhshme./MeteoBallkan
