Reshjet e para pak më serioze të dëborës do të na vijnë ditën e martë në Kosovë.
Sot jemi nën ndikimin e masave stabile anticiklonike dhe masave të ftohta ajrore me origjinë polare, mirëpo kjo do të ndryshojë nga dita e nesërme kur pritet të kemi shtim të vranësirave dhe reshje sporadike shiu dhe bore.
Gjatë natës mes së hënës dhe së martës dhe të martën në Kosovë pritet të depërtojë fronti i fuqishëm i ftohtë ajror. Erërat do të fillojnë përsëri të fryjnë nga veriu të cilat kalimthi mund të jenë të fuqishme. Fillimisht do të fillojnë reshje shiu, ndërsa me uljen e temperaturave reshjet e shiut do të shndërrohen në reshje shqote dhe bore. Reshjet e borës në intervale të caktuara mund të jenë të dendura. Reshjet e borës do të përfshijnë shumicën e territorit të Republikës së Kosovës gjatë ditës së martë, veriun e Malit të Zi, verilindjen e Shqipërisë si dhe perëndimin dhe veriperëndimin e Maqedonisë Veriore, lokalisht edhe vise tjera. Në viset mesdhetare dhe bregdetare të Shqipërisë priten reshje shiu.
Reshje më të dendura bore priten normalisht në viset kodrinore-malore.
Edhe kjo masë ajrore polare nuk do të jetë e qëndrueshme më shumë se dy ditë, por kjo është një hyrje dhe përkujtim për afrimin e stinës së dimrit e cila klimatologjikisht ka filluar që nga sot./Meteoballkan
