Fronti i ftohtë arrin në Kosovë gjatë orëve të ardhshme me erëra të fuqishme nga veriu dhe reshjet e shiut do të shndërrohen në reshje të dendura bore në shumë vise të Rrafshit të Kosovës dhe viset kodrinore-malore në përgjithësi. Fronti vjen afërsisht rreth mesnatës.
Ky front është një front klasik për fillim të dimrit, potent në depërtimin e tij por shumë shpejt qetësohet atmosferika. Edhe reshjet e dendura nuk do të zgjasin aq shumë. Pritet të krijohen disa shtresa të bardha sidomos në shumë pjesë të Rrafshit të Kosovës.
Gjatë kalimit të frontit do të ketë erëra kalimtare të forta nga veriu, reshje bore lokalisht të dendura dhe mund të ketë edhe vetëtima me bubullimë.
Menjëherë pas frontit (pas mesnate sonte) depërtojnë temperatura më të ulëta që janë të shënjuara me ngjyrën e kaltërt, megjithatë ajri i ngrohtë mesdhetar do të jetë shumë afër për tu rikthyer menjëherë gjatë ditës së Premte kur priten reshje të reja mjaft të dendura të shiut. Mbrëmjen e së premtes kemi edhe një front tjetër të ftohtë ajror që prapë rikthen temperaturat më të ulëta me erëra kalimtare të fuqishme nga veriu dhe reshje të reja kalimtare bore. Përpos viseve kodrinore-malore nuk pritet ndonjë akumulim signifikant i borës, megjithatë disa vise në Rrafshin e Kosovës mund të kenë mbulesë dekorative.
Pra, sonte presim reshjet e borës në shumë pjesë të Kosovës. Ato mund të mungojnë në shumë pjesë të Dukagjinit. Dita e Enjte do të jetë më e qetë por mjaft e ftohtë, ndërkohë që erërat dhe reshjet rikthehen të Premten./MeteoBallkan
