Vala e parë serioze e të ftohtit polar është para nesh për këtë sezonë dimërore.
Edhe nesër (e shtunë) do të jemi nën ndikimin e temperaturave jo aq të ftohta, ndërsa ulje e ndejshme temperaturave parashihet pikërisht nesër pasdite ose në mbrëmje vonë me fillimin e erërave të akullta veriore dhe veriperëndimore.
Kjo valë e të ftohtit polar do të përcillet edhe me reshje lokale, të herëpashershme bore veçanërisht në zonat kodrinore-malore, por fjolla bore priten në shumë vise tjera.
Duke filluar nga e diela temperaturat maksimale në zonat kontinentale vështirë që do të kalojnë në “plus” me ndonjë përjashtim normalisht, ndërsa ato minimale pritet të ulen jo rrallë deri në -10 gradë Celsius e në kulmin e të ftohtit ato mund të ulen edhe më shumë. Kulminacioni i të ftohtit polar pritet të zgjasë dy ose tri netë, ndërsa sipas ecurive aktuale rreth ditës së enjte do të fillojë të shfaqet “plusi” në shumë vise, ndërsa acari vazhdon gjatë netëve dhe mëngjeseve duke u zbutur gradualisht.
Ndjesia e të ftohtit polar do të jetë e fortë për shkak të erërave të akullta, ndërsa me dobësimin e erërave do të fillojë të zbutet edhe ndjesia subjektive e të ftohtit polar. Kjo goditje polare është plotësisht normale për këtë periudhë kohore./Meteoballkan
