Pas një Janari të ngrohtë, temperatura normale dimërore kanë përfshirë shumicën absolute të Kontinentit evropian dhe Gadishullin Ballkanik.
Tanimë jemi në fund të Janarit dhe gjendja sinoptike po bëhet mjaft interesante. Përpos Ballkanit edhe pjesa më e madhe e Turqisë nuk ka përjetuar ndonjë goditje dimërore sivjet, por kjo do të ndryshojë gjatë javës së re.
Një masë mjaft e ftohtë ajrore së bashku me masa të fuqishme ciklonike pritet të zhvillohet gjatë javës së re dhe të përfshijë Evropen juglindore dhe Turqinë duke shkaktuar reshje intensive shiu e bore dhe acar siberik. Ka gjasa për stuhi të fuqishme dimërore në disa pjesë të Greqisë, Turqisë, por duke mos përjashtuar edhe vendet tona.
Kjo masë e ftohtë ajrore do të përfshijë edhe territoret tona në fund të javës së ardhshme dhe po ashtu priten edhe reshje bore, por sasia e borës nuk mund të përcaktohet ende saktësisht ngase varet nga pozicionimi i saktë i masave të fuqishme ciklonike dhe anticiklonike.
Pra, Shkurti fillon me rritje afatshkurtra të temperaturave në territoret tona, por me disa fronte të dobëta që sjellin reshje lokale atmosferike. Një front shumë më i fuqishëm pritet rreth ditës së enjte ose të premte i cili mund të shoqërohet edhe me ciklon dhe masa mjaft të ftohta ajrore dhe të na sjellë reshje më të qëndrueshme bore.
Mbetet të shihet evoluimi i saktë i gjendjes sinoptike gjatë javës së re./MeteoBallkan
