Pjesa më e madhe e Evropës vazhdon të jetë nën ndikimin e një vale të fortë të të nxehtit, e cila po zhvendoset drejt lindjes.
Gjermania regjistroi dje paraprakisht temperaturën më të lartë të regjistruar ndonjëherë, me 41.3°C pranë qytetit Saarbrücken, afër kufirit me Francën. Parashikuesit e motit thonë se kushtet më të nxehta tani po përhapen në Evropën Qendrore dhe Lindore, përfshirë Poloninë dhe Ballkanin, gjatë fundjavës.
Rekordi i mëparshëm i nxehtësisë për Gjermaninë ishte 41.2 gradë Celsius, i raportuar më 25 korrik 2019 në Tönisvorst dhe Duisburg-Baerl në North Rhine-Westphalia.
Kampionati Evropian Ironman, që do të zhvillohet nesër në Frankfurt, është detyruar të përshtatet me kushtet ekstreme, ndërsa organizatorët kanë shkurtuar si itinerarin e çiklizmit ashtu edhe atë të vrapimit për shkak të vapës.
“Vala e të nxehtit do të arrijë kulmin gjatë fundjavës, me temperatura që në disa pjesë të Gjermanisë do të kalojnë 40°C,” tha për Reuters meteorologu Karsten Brandt nga faqja e parashikimit të motit Donnerwetter.de.
Franca ka përjetuar goditjen më të rëndë nga kjo valë e të nxehtit, me temperatura që në disa rajone kanë kaluar ndjeshëm mbi 40°C. Kushtet përvëluese kanë kontribuar në rritjen e numrit të viktimave të lidhura me vapën ditët e fundit, përfshirë dhjetëra raste mbytjesh, ndërsa njerëzit kërkonin mënyra për t’u freskuar. Të tjerë kanë humbur jetën pasi janë lënë në automjete të nxehta ose si pasojë e goditjes nga të nxehtit.
