Cikloni i fuqishëm tani ka filluar të dobësohet pak dhe gjendet mbi detin Jon dhe jug të Detit Adriatik, megjithatë ende ka potencial për reshje të dendura shiu dhe lokalisht edhe ndonjë rrebesh apo shtrëngatë shiu. Sot nga Maqedonia Veriore dhe Serbia juglindore kemi depërtim të vazhdueshëm të vranësirave të shiut mbi Kosovë dhe kjo gjendje pritet të vazhdojë edhe më tutje normalisht me intervale kohore.
Edhe pse kemi dobësim të ciklonit prapëseprapë bërthama e ajrit të lagësht dhe jo stabil vazhdimisht po sillet mbi rajonin tonë dhe për këtë arsye reshjet do të vazhdojnë.
Në viset bregdetare herë pas here pritet përmirësim, por gjithsesi nganjëherë duhet llogaritur edhe në zhvillime të vranësirave me reshje dhe rrebeshe shiu. Në përgjithësi reshjet do të vazhdojnë edhe gjatë orëve të ardhshme (veçanërisht në viset kontinentale- shumë më pak në viset bregdetare) dhe po ashtu edhe gjatë natës me intensitet të ndryshueshëm.
Në orët e hershme të mëngjesit të nesërm dhe paradite reshjet në shumë rajone do të duhej të pushojnë sipas modeleve, por pasdite përsëri priten reshje shiu dhe rrebeshe lokalisht të fuqishme shiu me vetëtima dhe bubullimë./Meteoballkan
