Mbrëmë ishte një natë e stuhishme në shumë pjesë të Evropës, Ballkanit, por edhe Kosovës dhe Shqipërisë, ku u regjistruan edhe disa dëme materiale. Vende-vende pati edhe reshje të dendura shiu siç ishte rasti në rajonin e Pejës dhe disa vise tjera, ndërsa në disa rajone reshjet ishin simbolike.
Mot i ngjashëm do të vazhdojë edhe ditëve të ardhshme mbi rajonin tonë, kur herë pas here dhe vende-vende priten reshje shiu, erëra të fuqishme dhe reshje bore vetëm në viset malore. Erërat do të jenë të fuqishme përsëri herë pas here sidomos nesër (të mërkurën) por nuk do të duhej të ishin më të fuqishme se natën e kaluar në bazë të parashikimeve.
Natën e ndërrimit të motmoteve priten ulje të lehta të temperaturave. Do të ketë alternime mes vranësirash dhe kthjellimesh si erëra të lehta deri mesatare nga jugperëndimi. Në Shqipëri mund të ketë edhe riga lokale kryesisht të dobëta shiu. Dita e parë e vitit 2021 pritet të jetë me intervale kohore me diell, vranësira kalimtare dhe erëra mesatare nga jugperëndimi./Meteoballkan
