Për shkak të gjendjes sinoptike këto ditë moti vazhdon të jetë mjaft jo-stabil me zhvillime lokale të jo-stabiliteteve atmosferike. Depërtimi i vazhdueshëm i masave ajrore jo-stabile nga Atlantiku kushtëzonë krijimin e cikloneve në Evropen lindore. Një ciklon i tillë është i stacionuar në jugperëndim të Rusisë dhe verilindje të Ukrainës, por ky ciklon do të ndikojë në motin mbi rajonin tonë vetëm edhe të shtunën.
Si pasojë sot dhe nesër do të vazhdojnë jo-stabilitet e fuqishme por të izoluara, intervalet kohore me diell të cilat janë sikur të hedhësh zjarr në benzin në këto raste për krijimin e vranësirave të reja konvektive, prandaj në disa rajone priten rrebeshe të fuqishme, ndërsa rajone tjera mund të mbesin me riga simbolike.
Të dilelën ndryshon gjendja sinoptike, por jo për të mirë. Cikloni i Rusisë largohet nga rajoni anë ndërsa në Evropën veriore depërton një tjetër ciklon i fuqishëm gjegjësisht në Finlandë. Ky ciklon nga Atlantiku verior dhe Finlanda do të shtrihet në shtetet Baltike, shkurtimisht edhe në Evropen qendrore dhe shumë shpejt do të bartet drejt Evropës lindore, por ne nuk do ti shpëtojmë sistemit të tij frontal.
Fronti i fuqishëm në kuadër të këtij cikloni do të depërtojë në Kosovë gjatë së dielës me erëra veriore, reshje shiu dhe rrebeshe lokale me vetëtima dhe bubullimë, ndërsa pas depërtimit të frontit temperaturat ulen edhe më shumë. Vonë të dielen reshje lokale por më të dobëta priten edhe në Maqedoninë Veriore dhe Shqipëri. Pas frontit temperaturat mbesin të ulëta në Kosovë sidomos gjatë ditës së hënë, por edhe dita e martë pritet të jetë e freskët, por pa reshje shiu, sepse përkundër temperaturave të ulëta atmosfera do të stabilizohet nga e hëna. Staibilizimi i atmosferës do të vijë nga anticikloni evropian i cili do të shtrihet gradualisht nga fillimi i javës së ardhshme. Temperaturat do të fillojnë të rriten sidomos nga e mërkura kur priten disa ditë të ngrohta dhe stabile verore.
Se sa do të zgjasë moti i morë dhe stabil është e vështirë të përcaktohet nga sot. Modeli GFS parasheh ndikimin e anticiklonit stabil më shumë se një javë, ndërsa modeli ECMWF parasheh 5 ditë pa reshje atmosferike, gjegjësisht ky model parasheh destabilizim të atmosferës në Kosovë të shtunën me 19 Qershor.
Pra, sipas modelit më të saktë në glob nga e hëna deri të premtën nuk priten reshje, nga mërkura deri të shtunën nxehtësi verore, ndërsa të shtunën me 19 Qershor pasdite në Kosovë rrebeshe lokale shiu me vetëtima dhe bubullimë.
Ishte ky një tekst më i gjatë dhe parashikim afatgjatë për shkak të shumë pyetjeve sidomos për kositësit e livadheve. Gjendja aktuale është kjo që e përshkruam më lartë dhe nëse ndodh ndonjë ndryshim ne do ju njoftojmë me kohë./Meteoballkan
