Temperaturat kanë kulmuar sot në Gadishullin Ballkanik dhe kanë arritur deri në 30 gradë Celsius anekënd Ballkanit duke përfshirë edhe territoret tona në Shqipëri, ndërsa në Kosovë temperaturat ka arritur deri në 28 gradë Celsius shifër kjo ekstreme për këtë periudhë kohore. Në disa vise të Ballkanit temperatura ka shkuar deri në 32 gradë Celsius.
Rrymimet shumë të fuqishme atmosferike nga jugu dhe aktivitetet e fuqishme ciklonike në Evropë kanë shkaktuar fluks të ajrit mjaft të nxehtë afrikan në drejtim të territoreve tona.
Temperatura shumë të larta po mbretërojnë sot në Kroaci, Bosnjë dhe Hercegovinë, Serbi, Mal të Zi, Shqipëri, Kosovë dhe Maqedoni Veriore, ndërsa nesër në disa vise priten stuhi të fuqishme sidomos në jug të Bosnjës dhe Hercegovinës dhe Mal të Zi. Nesër orëve të pasdites ose mbrëmjes stuhi priten edhe në disa vise në veri të Shqipërisë e më vonë edhe në disa zona tjera të Shqipërisë po nuk priten reshje gjithëpërfshirëse. Reshjet do të arrijnë edhe në rajonin e Dukagjinit nesër vonë dhe lokalisht edhe në vise tjera të Republikës së Kosovës, por nuk priten reshje shumë të mëdha në Kosovë dhe po ashtu nuk priten reshje në tërë territorin.
Sistemi shumë i fortë frontal do të përqëndrohet më së shumti në Mal të Zi dhe jug të Hercegovinës me reshje dhe rrebeshe mjaft të furishme shiu ku priten edhe vërshime lokale. Nga ky sistem disa stuhi tjera formohen në disa pjesë të Shqipërisë dhe po ashtu edhe ndonjë në territorin e republikës së Kosovës.
Nga e diela ulje të lehta të temperaturave dhe priten intervale me diell e vranësira lokale me ndonjë reshje të izoluar, por do të vazhdojë moti mjaft i nxehtë për këtë periudhë kohore./METEOBALLKAN
