Cikloni i fuqishëm nga Adriatiku do të kalojë sonte dhe nesër drejtë Evropes verilindore duke sjellur edhe një valë reshjesh të dendura lokale atmosferike sidomos në disa rajone të Shqipërisë dhe Kosovës.
Vende-vende priten rrebeshe lokalisht të fuqishme shiu me vetëtima dhe bubullimë. Është ky cikloni i fundit i një serie ciklonesh të fuqishme që sollën reshje atmosferike në vendin tonë. Këto reshje ishin shumë të mirëseradhura për të përmirësuar sadopak gjendjen hidrologjike në Kosovë.
Gjatë natës sonte në Kosovë priten rrebeshe lokalisht të fuqishme me ndonjë vetëtimë dhe bubullimë, ndërsa nesër pritet dobësimi i ciklonit, por ende do të vazhdojnë rrebeshe lokale herë pas here edhe pse me intensitet më të ulët. Nesër në mbrëmje temperaturat do të fillojnë të pësojnë ulje për shkak të largimit të ciklonit dhe fillimit të ardhjes së ajrit të ftohtë polar, Në disa vise priten reshje kalimtare bore.
Nga e diela anticiklone të fuqishme do të marrin situatën në kontroll në rajonin tonë dhe si pasojë pritet të ketë mot pa reshje atmosferike. Fillimisht do të kemi një anticiklon të ftohtë kontinental që do të kushtëzojë ngrica dhe acar në mëngjes, ndërsa pas disa ditëve do të kemi anticiklon pak më të ngrohtë mesdhetar që do të kushtëzojë rritje të temperaturave ditore. Reshje atmosferike nuk do të ketë disa ditë nga e diela e tuje./MeteoBallkan