Një ciklon nga Evropa po vjen në drejtim të viseve tona duke kushtëzuar ndryshim të motit në vazhdën e motit shumë të ndryshueshëm të ditëve të fundit.
Cikloni ka filluar të ndikojë në atmosferë ku shihen vranësira të shtuara dhe në rajonin e Pejës dhe Istogut priten edhe riga shiu. Përpos veriperëndimit të Kosovës ndonjë rigë shiu mund të ketë edhe në viset tjera, ndërsa reshjet e dendura të shiut fillojnë në Mal të Zi.
Fatmirësisht reshjet e dendura nuk pritet të zgjasin shumë në viset tona sepse përndryshe do të mund të shkaktonin probleme të reja.
Reshjet e shiut më intensive do të fillojnë në Mal të Zi dhe gjatë natës do të shtrihen në territorin e Shqipërisë deri mëngjesin e nesërm dhe pastaj do të përfshijnë edhe Kosovën dhe Maqedoninë Veriore. Priten disa intervale reshjesh dhe rrebeshesh shiu dhe së paku një intervale do të jetë me reshje të dendura.
Pra, për të qenë sa më i qartë dhe sa më informues reshje të dendura në Kosovë parashihen mëngjesin e së Premtes dhe borë pritet të ketë vetëm në malet e larta. Reshjet pritet të vazhdojnë lokalisht edhe paradite, ndërsa gjatë ditës reshjet pushojnë, por pasdite vonë erërat do të ndryshojnë drejtim dhe do të fillojnë të fryjnë nga veriu të cilat do të sjellin ajrin e ftohtë dhe reshje kryesisht të pakta, shqote, shiu të ngrirë dhe bore.
Rrebeshe intensive shiu me vetëtima dhe bubullimë herët në mëngjes priten edhe në shumë pjesë të Shqipërisë dhe Malit të Zi ku mund të ketë edhe vërshime të reja të shpejta.
Edhe një dimër jashtëzakonisht i dobët në aspektin e reshjeve të borës në viset e ulëta të Kosovës dhe Maqedonisë së Veriut. Fundi i Shkurtit parashihet me rritje të temperaturave pothuajse pranverore.
Mund të jetë ky cikloni i fundit nga seria e disa cikloneve mjaft të fuqishme që përshkuan rajonin tonë këtë muaj edhe pse çuditshëm pa ndonjë impakt të madh në motin dimëror.
Sidoqoftë, edhe pse kaluam edhe një dimër jashtëzakonisht të dobët ndryshe ishte në gati tërë Kontinentin e Evropës kur pati mjaft reshje bore në gati tërë Kontinentin, madje reshje bore u regjistruan këtë dimër edhe në Portugali dhe atë jo të rralla.
Është pak shqetësuese kjo rritje e temperaturave në fund të këtij muaji sepse do të përshpetojë ngjalljen e vegjetacionit dhe ndonjë pastaj ndonjë goditje e mundshme dimërore në Mars apo edhe në Prill mund të shkaktojë dëme të mëdha në vegjetacionin e hershëm, por të shpresojmë që të mos përsëritet pranvera e kaluar kur ndodhi acari më 7 dhe 8 Prill duke dëmtuar gati të gjitha pemët në Republikën e Kosovës./MeteoBallkan
