Vranësira të dendura kanë përfshirë Ballkanin sidomos atë perëndimor dhe verior me reshje mesatare deri të dendura shiu. Reshje të dendura ka në veri të Shqipërisë dhe reshjet pritet të vazhdojnë gjatë natës duke u forcuar edhe në territorin e Republikës së Kosovës.
Vende-vende priten intervale reshjesh mjaft të dendura shiu, ndërsa ato pritet të pushojnë gjatë orëve të hershme të mëngjesit të së martës në Kosovë, për të vazhduar në formë të rrebeshe të herëpashershme lokale edhe gjatë ditës së martë, më të theksuara në Shqipëri.
Sistemi i fuqishëm i vranësirave gjatë natës pritet të sjellë reshje në tërë rajonin tonë, ndërsa pritet të fillojë të shpërbëhet gjatë orëve të mëngjesit të së martës.
Pamja satelitore është e çastit ku shihen qartë vranësirat në Ballkanin perëndimore dhe më gjerë, ndërsa Institutet meteorologjike si në Shqipëri, po ashtu edhe në Kosovë kanë paralajmëruar për mundësinë e vërshimeve lokale.
Gjendja më e rëndë duket se do të jetë në Shqipëri, por kujdesi duhet të jetë në nivele të larta edhe në Kosovë e rajon.
Përndryshe, reshjet do të jenë jashtëzakonisht të mirëseardhura për mbushjen e lumenjve dhe liqejve të territoreve tona dhe të shpresojmë që pasojat eventuale të janë sa më të pakta./MeteoBallkan