Mëngjesin e sotmëm në një nga vendet më të ftohta në botë, temperatura shënoi -41 gradë celcius.
Bëhet fjalë për një fshat në Sibir, që konsiderohet si vendi më i ftohtë i banuar në Tokë, njofton MeteoBallkan.
Fshati Oymyakon gjendet në Republikën Saha, në pjesën lindore të Siberisë. Që nga viti 1926 në këtë vend mbizotërojnë temperatura të ulëta, ku ajo më e ulëta që ndonjëherë është shënuar ka shkuar deri në minus 71.2 gradë Celsius.
Në këtë fshat jetojnë 500 njerëz, makinat parkohen vetëm brenda garazheve dhe dyqanet shesin vetëm peshk dhe mish.
Pavarësisht të ftohtit, falë ajrit të pastër, ushqimit të shëndetshëm dhe ujit të pastër, banorët e Oymyakonit njihen për jetëgjatësinë.
Si rezultat i temperaturave të ulëta nuk ka kurrfarë sinjali të telefonisë mobile, kurse turizmi është i zhvilluar duke u bazuar në specifikat e ndryshimeve klimatike.
Në fshat ka shkolla dhe çerdhe, shtëpi të kulturës dhe qendër sportive. Por edhe nëse temperaturat bien në minus 50 gradë celsius, fëmijët vazhdojnë të shkojnë në shkollë. Ndërsa mësimi ndërpritet për nxënësit nga klasa e parë deri te e pesta nëse temperaturat bien në minus 52 gradë celsius.
