Faqja amerikane meteorologjike AccuWeather ka njoftuar se Uragani Florence do të shkaktojë dëme ekonomike prej së paku 50 deri në 60 miliardë dollarë, njofton MeteoBallkan.
Themeluesi dhe kryetari i AccuWeather, Joel Meyers, tha në një deklaratë se shumica e dëmit do të shkaktohet nga përmbytjet, faktori i dytë më i madh do të ishin dëmtimet në bregun amerikan dhe pasoja e tretë dëmet që do të lënë erërat.
Uragani Florence po ngadalësohet ndërsa afrohet në bregun lindor të Shteteve të Bashkuara, por ndikimi i tij në Karolinën e Veriut nuk do të reduktohet dhe pritet të shkaktojë përmbytje të rrezikshme, tha drejtori i Qendrës Kombëtare të Uraganeve, Ken Grey.
Nëse Florence qëndron përgjatë bregut për ditë, përmbytjet mund të godasin së paku tre milje në brendësi të tokës, paralajmëroi Gray.
Qendra Kombëtare e Uraganeve tha se erërat e stuhive do të arrinin deri në 315 kilometra nga qendra e saj, gjë që do të rrezikonte pjesën më të madhe të bregut lindor të Shteteve të Bashkuara./MeteoBallkan
