Një djalë në Australi, i cili i shpëtoi për pak vdekjes kur u sulmua nga një peshkaqen, fitoi të drejtën për të mbajtur dhëmbin e grabitqarit, që kishte ngecur në tavolinën e tij të sërfit.
Sërfisti Chris Blowes, humbi një këmbë nga ai incident i vitit 2015 dhe qëndroi për 10 ditë në koma. Dhëmbi i peshkaqenit ngeci në tavolinën e sërfit, por ligjet vendase nuk e lejonin që të mbante pjesë nga kafshë që ishin të mbrojtura.
Por vendimi u ndryshua dhe Blowes vendosi ta mbante dhëmbin si “suvenir”. 32-vjeçari tha për BBC se peshkaqeni që e sulmoi ishte 5,5 metra i gjatë. “Më sulmoi nga pas dhe arriti të më këpuste këmbën”.
Pasi miqtë e shpëtuan dhe e nxorën në breg, policia gjeti dhëmbin në tavolinën e sërfit dhe ia dorëzoi autoriteteve. Gjoba për mbajtje të paligjshme të sendeve të tilla arrin deri në 100 mijë dollarë australianë, ose 64 mijë euro. Fillimisht lutjet e të mbijetuarit u injoruan, por pasi një politikan vendas u njoh me rastin e tij arriti të ndikonte që të bëhej një përjashtim.
“Do t’ia tregoj nipërve të mi”, tha Blowes.
