Nesër në Kosovë pritet të mbajë mot me intervale kohore me diell dhe zhvillime lokale të vranësirave. Vende-vende priten rrebeshe lokale shiu me vetëtima dhe bubullimë. Reshjet e nesërme do të jenë më të rralla dhe më të izoluara. Temperaturat shënojnë rritje të lehta dhe pritet zagushi.
Në Shqipëri nesër pritet të mbajë mot i vërtetë veror dhe kryesisht me diell dhe vranësira të pakta vende-vende. Vetëm në veri mund të ketë ndonjë rrebesh të izoluar shiu. Intervale të gjata kohore me diell nesër priten edhe në Maqedoninë Veriore dhe Luginën e Preshevës, ndërsa në disa rajone rrebeshe të izoluara shiu. Temperaturat shënojnë rritje sidomos në Maqedoni.
Në Mal të Zi nesër nxehtësi tropikale, ndërsa në veri të vendit më freskët dhe me ndonjë rrebesh shiu.
Të hënën rritje të theksuara të temperaturave në tërë rajonin, megjithatë në Kosovë, veriun e Malit të Zi dhe disa vise në Maqedoninë Veriore nxehtësinë do të ndërpresin zhvillimet e fuqishme lokale të disa stuhive të izoluara të cilat pritet të kushtëzojnë rrebeshe lokalisht të fuqishme shiu me vetëtima, bubullimë dhe mundësi edhe për breshër.
Nga e marta verë e vërtetë, me nxehtësi tropikale apo afrikane. Temperaturat pritet të arrijnë rreth 34-35 gradë Celsius, lokalisht edhe më lartë. Përkundër depërtimit të masës së fuqishme të nxehtë afrikane atmosfera nuk do të jetë krejtësisht stabile. Rrallë në disa rajone (kryesisht kodrinore-malore) ende priten zhvillime të disa stuhive të izoluara shiu me vetëtima dhe bubullimë./Meteoballkan
