Edhe një javë mjaft e nxehtë parashihet në Kosovë, Shqipëri dhe mbarë rajonin.
Masat e fuqishme të nxehtësisë afrikane dhe masat e thata ajrore anticiklonike do të dominojnë gjatë fillimit dhe mesit të kësaj jave.
Na presin shumë rreze diellore dhe temperatura mjaft të larta.
Temperaturat maksimale më të lartat priten të mërkurën në Kosovë kur pritet të arrijnë deri në 38°C. Në rajon më gjerë përsëri priten 40°C në disa lokacione në Maqedoni dhe Shqipëri ku tradicionalisht është vapë.
Lajmi i mirë është se afër fundjavës mund të kemi depërtimin e disa masave ajrore jo-stabile të cilat pritet të sjellin freskim në viset tona kontinentale sidomos në Kosovë, Luginë, veriun e Malit të Zi, dhe disa vise në Maqedoninë Veriore. Në Kosovë priten edhe rrebeshe lokale shiu me vetëtima dhe bubullimë të premtën pasdite.
Pra, nga e premta do të kemi ulje të temperaturave dhe po ashtu edhe në fushat barike ose presionin atmosferik dhe në viset tona kontinentale pasditeve priten destabilzime të atmosferës me rrebeshe lokalisht të fuqishme shiu me vetëtima, bubullimë dhe mundësi edhe për breshër. Freskia pritet të jetë jashtëzakonisht e mirëseardhur, por deri atëherë kujdes nga vapa e fortë./Meteoballkan