Këto ditë jemi nën ndikimin e masave ajrore të thata anticiklonike dhe masave të nxehta me origjinë nga Afrika Veriore. Për këtë arsye moti është kryesisht i kthjellët dhe mjaft i nxehtë. Kjo gjendje sinoptike është krejtësisht normale sepse gjendemi afër mesit të stinës më të nxehtë të vitit.
Temperaturat e larta do të shoqërohen edhe nga pluhuri Saharian. Në anën tjetër në perëndim dhe qendër të Evropës kemi ciklonin e fuqishëm nga Atlantiku i cili gradualisht do të zhvendoset në rajonin tonë. Pikërisht ky ciklon po kushtëzon rrymime të forta ajrore nga Afrika Veriore drejt territoreve tona. Me afrimin gradual të ciklonit rriten edhe temperaturat. Ky ciklon herë pas here po shkakton stuhi dhe reshje të mëdha shiu në Francë, Zvicër dhe pjesë të Gjermanisë. Kësaj radhe ecuria e këtij cikloni të shtresave të larta atmosferike favorizon ardhjen e tij në territoret tona, por deri sa cikloni të vije duhet të kalojnë disa ditë mjaft të nxehta dhe duhet pas kujdes nga i nxehti ekstrem.
Me afrimin e fundjavës cikloni zhvendoset në Mesdheun qendror dhe pastaj drejt territoreve tona, kështu që temperaturat rriten ende tek ne por edhe flladi që pason pas ndonjë fronti të këtij cikloni.
Me ardhjen e ciklonit gjatë apo pas fundjavës në territoret tona do të ndryshojnë rrymimet ajrore dhe do të fillojnë të fryjnë erëra të freskëta nga veriperëndimi. Po ashtu cikloni pritet të jetë i pasur me lagësishti dhe do të kushtëzojë edhe reshje të dendura shiu dhe rrebeshe lokalisht të fuqishme shiu me vetëtima dhe bubullimë.
Reshjet do të përfshijnë viset tona kontinentale dhe shumë më pak viset bregdetare, por nuk përjashtohet mundësia që rrebeshe lokale dhe vranësira të paraqiten shkurtimisht edhe në disa vise bregdetare gjatë fundjavës eventualisht fillimit të javës tjetër.
Pra, para nesh disa ditë shumë të nxehta, ndërsa relaksimi vjen për fundjavë kur priten edhe rrebeshe shiu me vetëtima dhe bubullimë në viset tona kontinentale. Rrebeshe intensive priten vende-vende në Kosovë.
Kësaj radhe cikloni është më i fuqishëm dhe sipas të gjitha gjasave do të ndikojë dukshëm në zbutjen e thatësisë ekstreme për ato rajone të cilat nuk kanë përfituar reshje shiu kaherë në Kosovë dhe disa vise në Shqipëri dhe Maqedoninë e Veriut, megjithatë vende-vende përsëri priten rrebeshe intensive dhe ndoshta edhe ndonjë shtrëngatë e fuqishme e cila eventualisht mund të shkaktojë dëme.
Sidoqoftë, me afrimin e fundjavës pritet të kemi edhe ndryshime të vogla në sasinë apo distribuimin e reshjeve atmosferike dhe për çdo ndryshim eventual do ju njoftojmë me kohë. Deri atëherë jashtëzakonisht nxehtë./Meteoballkan
