Sot në Kosovë pritet të mbajë mot me intervale kohore me diell dhe vranësira të herëpashershme. Na pret mot shumë më i këndshëm se ditët që lamë pas.
Priten edhe zhvillime të vranësirave vertikale të cilat pritet të kushtëzojnë rrebeshe lokale shiu me vetëtima, bubullimë dhe mundësi për breshër. Vende-vende priten rrebeshe intensive (më shumë gjasa në Dukagjin), por reshjet nuk pritet të jenë gjithëpërfshirëse, ngase disa rajone mund të mbesin pa asnjë pikë shiu.
Në Shqipëri, Maqedoninë Veriore, Mal të Zi dhe Luginë pritet të mbajë mot më i freskët krahasuar me ditët që lamë pas. Priten intervale kohore me diell dhe vranësira të cilat në disa rajone mund të kushtëzojnë ndonjë rrebesh të fuqishëm shiu me vetëtima dhe bubullimë. Pritet mot shumë më i këndshëm dhe ndërprerje e përkoshme e valës së fuqishme të nxehtësisë.
Të shtunën stabilizim i plotë i motit. Na pret ditë kryesisht me diell dhe jo shumë e nxehtë, megjithatë priten rritje graduale të temperaturave. Nga e diela përsëri kemi rikthimin e vapës së fortë verore./Meteoballkan
